Xəbərlər

“Təhsil” istirahət mərkəzində tələbələr üçün ixtisas yönümlü qış düşərgələri yekunlaşıb

Elm və Təhsil İşçiləri Həmkarlar İttifaqı və “Bir Könüllü” Tələbələrin Əməkdaşlığı İctimai Birliyinin birgə təşkilatçılığı ilə tələbələr üçün 5-9 fevral tarixlərində keçirilən ənənəvi ixtisas yönümlü qış düşərgələri yekunlaşıb.

“Təhsil” İstirahət Mərkəzində baş tutan düşərgələrin əsas məqsədi iştirakçıların ixtisas biliklərinin dərinləşdirilməsi, analitik və tənqidi düşünmə, problem həll etmə, innovativ yanaşma, eləcə də liderlik və komanda işi bacarıqlarının inkişaf etdirilməsi olub. Layihə çərçivəsində gənclərin gələcək akademik və peşəkar fəaliyyətə hazırlıq səviyyəsinin artırılması prioritet kimi müəyyən edilib.

Cari il üzrə düşərgələr iki istiqaməti əhatə edib. Riyaziyyat sahəsi üzrə “MathCamp2026” layihəsi “Bir Könüllü” Tələbələrin Əməkdaşlığı İctimai Birliyi, Elm və Təhsil İşçiləri Həmkarlar İttifaqı və “PathtoMath” Həvəskar Riyaziyyatçılar Klubunun birgə təşkilatçılığı ilə həyata keçirilib. Texnologiya və mühəndislik istiqamətləri üzrə “TechCamp2026” düşərgəsi isə “ESTIEM LG Baku” və “EESTEC LG Baku” təşkilatlarının tərəfdaşlığı çərçivəsində təşkil olunub.

Düşərgələrdə seçim mərhələsindən keçmiş riyaziyyat, texnologiya, mühəndislik və əlaqəli sahələr üzrə təhsil alan əlli nəfərə yaxın perspektivli tələbə iştirak edib. Proqram çərçivəsində ixtisaslaşmış təlimlər, praktiki məşğələlər, layihə əsaslı fəaliyyətlər və mentorluq görüşləri keçirilib.

Qeyd edək ki, Elm və Təhsil İşçiləri Həmkarlar İttifaqı gənclərin bilik və bacarıqlarının inkişafına yönəlmiş tədris və innovasiya yönümlü təşəbbüslərin həyata keçirilməsinə davamlı dəstək göstərir.

Elm və Təhsil İşçiləri Həmkarlar İttifaqı Neftçala Rayon Komitəsinin təşəbbüsü ilə Azərbaycan çempionatının seçmə mərhələsində uğur qazanan şahmatçılar mükafatlandırılıb

Elm və Təhsil İşçiləri Həmkarlar İttifaqı Neftçala Rayon Komitəsinin təşəbbüsü ilə Neftçala Uşaq-Gənclər İdman-Şahmat Məktəbində 8, 10, 12, 14 və 16 yaşadək yeniyetmələr arasında şahmat üzrə Azərbaycan çempionatının seçmə mərhələsində uğur qazanan şagirdlərlə görüş keçirilib. Görüş çərçivəsində qaliblər hədiyyə və sertifikatlarla təltif olunublar. Tədbirin sonunda müəllimlərin iş şəraiti ilə yaxından tanış olunub, kollektivlə səmimi fikir mübadiləsi aparılıb.

🥇 I yer

Gülməmmədli Nilay Məhəmməd qızı (8 yaş)

🥈 II yerlər

Məmmədli Yusif Elnur oğlu (8 yaş)

Musazadə Yunis Vidadi oğlu (10 yaş)

Zeynallı Pərvinə Aftil qızı (14 yaş)

🥉 III yerlər

Əmirli Rüqəyya Cavid qızı (10 yaş)

Məmmədli Uğur Fuad oğlu (14 yaş)

🔅Qalibləri və müəllimləri təbrik edir, növbəti yarışlarda da uğurlar arzu edirik!

ETİHİ Respublika Komitəsi tərəfindən 700-dən çox ittifaq üzvü üçün ekskursiya və turlar təşkil olunub

Elm və Təhsil İşçiləri Həmkarlar İttifaqı Respublika Komitəsi tərəfindən yanvar ayı ərzində 700 nəfərdən çox ittifaq üzvü üçün ekskursiya və turlar təşkil olunub.

Belə ki, 533 nəfər təhsil işçisi rayon və şəhər komitələrinin təşkilatçılığı ilə Quba, Qusar, Qəbələ, Şamaxı və Astara rayonlarına təşkil edilmiş bir neçə günlük turlardan yararlanaraq istirahət ediblər.

168 nəfər təhsil işçisi isə "İçərişəhər" Tarix-Memarlıq Qoruğuna və açıq səma altında yerləşən Qala Etnoqrafiya Muzeyinə ekskursiya ediblər.

Qeyd edək ki, bu cür maarifləndirici və istirahət xarakterli gəzintilər gələcəkdə də mütəmadi olaraq təşkil ediləcəkdir.

Elm və Təhsil İşçiləri Həmkarlar İttifaqı Neftçala Rayon Komitəsinin təşkilatçılığı ilə növbəti yubiley tədbiri keçirilib

Elm və Təhsil İşçiləri Həmkarlar İttifaqı Neftçala Rayon Komitəsi tərəfindən həyata keçirilən “Həmkara dəyər” layihəsi çərçivəsində növbəti görüş uzun illər pedaqoji fəaliyyət göstərmiş, İkinci Qaralı kənd tam orta məktəbinin coğrafiya müəllimi Dürnisə Sadıqovanın 65 illik yubileyi münasibətilə təşkil olunub.

Yubiley tədbirində müəllimə çoxillik səmərəli fəaliyyətinə görə fəxri fərman, gül dəstələri və mükafat təqdim olunub. Görüş zamanı məktəb kollektivi çıxış edərək yubilyarın təhsil sahəsindəki zəngin fəaliyyətindən, gənc nəslin formalaşmasında göstərdiyi əvəzsiz xidmətlərdən və kollektivə verdiyi dəyərli töhfələrdən qürurla söz açıb. Yubilyar isə ona göstərilən diqqət və qayğıya görə dərin minnətdarlığını və səmimi təşəkkürünü ifadə edib. Tədbirin sonunda məktəbdə müəllimlərin iş şəraiti ilə yaxından tanış olunub, kollektivlə səmimi fikir mübadiləsi aparılıb. 

Qeyd edək ki, “Həmkara dəyər” layihəsi çərçivəsində təhsil sahəsində uzun illər vicdanla fəaliyyət göstərən əməkdaşların yubileylərinin qeyd olunması və əməyinin yüksək qiymətləndirilməsi bundan sonra da davam etdiriləcək.

Elm və Təhsil İşçiləri Həmkarlar İttifaqı Neftçala Rayon Komitəsi “Ey hörmətli müəllim!” layihəsi çərçivəsində Neftçala rayon Bəhruz Həşimov adına Boyat kənd tam orta məktəbinin ittifaq üzvləri ilə görüş keçirib.

👩‍🏫“Ey hörmətli müəllim!” layihəsi uğurla davam edir.

 Elm və Təhsil İşçiləri Həmkarlar İttifaqı Neftçala Rayon Komitəsi tərəfindən həyata keçirilən “Ey hörmətli müəllim!” layihəsi çərçivəsində bu dəfə Neftçala rayon Bəhruz Həşimov adına Boyat kənd tam orta məktəbinin ittifaq üzvləri ilə görüş keçirilib. Görüş zamanı Komitənin sədri Könül Məmmədova məktəbdə fəaliyyət göstərən müəllimlərlə səmimi söhbətlər aparıb, onların iş şəraiti ilə yaxından tanış olub, sosial rifahı və psixoloji təhlükəsizlik vəziyyəti ilə maraqlanıb. Sağlam və hörmətə əsaslanan kollektiv mühitinin formalaşmasına verdiyiniz töhfələr üçün təşəkkür edirik.

“Azərbaycan Nəşriyyatları Assosiasiyası” İctimai Birliyində Həmkarlar İttifaqı təsis olunub

Azərbaycan Nəşriyyatları Assosiasiyasında Həmkarlar İttifaqı Komitəsinin təsis yığıncağı keçirilib. Təsis iclasında Assosiasiya nəzdində Həmkarlar İttifaqı Komitəsinin yaradılması ilə bağlı təşkilati məsələlər müzakirə olunub.

Tədbirdə Azərbaycan Nəşriyyatları Assosiasiyasının 14 nəfər əməkdaşı, həmçinin Elm və Təhsil İşçiləri Həmkarlar İttifaqı Respublika Komitəsi sədrinin müavini Mirzə Cəfərzadə və sədrin müşaviri Renata Mansurova iştirak ediblər.

Təsis iclasında Həmkarlar İttifaqı Komitəsinin və Təftiş Komissiyasının üzvləri, eləcə də komitənin sədri seçilib, yaradılan qurumun ETİHİ Respublika Komitəsinin xidmətinə qəbul edilməsi barədə qərar qəbul olunub.

Elm və Təhsil İşçiləri Həmkarlar İttifaqı Respublika Komitəsi yeni üzvləri ilə birgə həmrəyliyə əsaslanan fəaliyyət istiqamətini davam etdirməkdədir.

Yanvar ayında yollayışlardan yararlananların statistikası

Elm və Təhsil İşçiləri Həmkarlar İttifaqı Respublika Komitəsi yanvar ayında ittifaq üzvlərinə sanatoriya-kurort yollayışları təqdim edərək onların Azərbaycan Həmkarlar İttifaqları Konfederasiyasının tabeliyindəki müalicə və istirahət mərkəzlərindən faydalanmasını təmin edib.

Ay ərzində ümumilikdə 449 nəfər yollayışdan yararlanıb. Onların 216 nəfəri ittifaq üzvü, qalanları isə ailə üzvləridir.

Yanvar ayında ilk həmkarlar təşkilatlarının sədrləri üçün keçirilən proqram çərçivəsində ailə üzvləri ilə birlikdə 92 nəfər 3 günlük müalicə paketindən yararlanıb.

Bununla yanaşı, rayon və şəhər komitələrinin təşkil etdiyi ekskursiyalara 165 nəfər ittifaq üzvü cəlb edilib.

Elm və Təhsil İşçiləri Həmkarlar İttifaqı Neftçala rayon Komitəsinin təşkilatçılığı ilə “İlham verən gənclik” adlı tədbir keçirilib.

Elm və Təhsil İşçiləri Həmkarlar İttifaqı Neftçala rayon Komitəsinin təşkilatçılığı ilə 2 Fevral – Azərbaycan Gəncləri Günü münasibətilə “İlham verən gənclik” adlı tədbir keçirilib.  

Tədbirdə rayon rəsmiləri,  təhsil müəssisələrində çalışan gənc həmkarlar ittifaqı üzvləri, müəllimlər və qazilər iştirak ediblər.

Rəsmi hissədə Azərbaycan Respublikasının Dövlət Himni səsləndirilib, Ümummilli lider Heydər Əliyevin və Vətən uğrunda həyatını itirmiş şəhidlərin əziz xatirəsi ehtiramla yad olunub.

Çıxış edənlər ölkəmizdə gənclərə göstərilən dövlət qayğısından, gənc müəllimlərin təhsil sahəsinin inkişafındakı rolundan bəhs edərək iştirakçılara uğurlar arzulayıblar.

Sonra təhsil və ictimai həyatda fərqlənən gənc müəllimlər  və təhsil işçiləri hədiyyə və fəxri fərmanlarla təltif olunublar.

Görüşün ikinci hissəsində əyləncəli interaktiv sual-cavab sessiyaları və maraqlı viktorinalar təşkil olunub.

Viktorinalarda qalib gələn iştirakçılar hədiyyələrlə mükafatlandırılıb.

Tədbirin sonunda qonaqlar göstərilən diqqətə və səmərəli şəraitin yaradılmasına görə təşəkkürlərini bildiriblər

2 fevral – Azərbaycan Gəncləri Günü münasibətilə Elm və Təhsil İşçiləri Həmkarlar İttifaqının rayon və şəhər komitələri tərəfindən tədbirlər keçirilib

2 fevral – Azərbaycan Gəncləri Günü münasibətilə Elm və Təhsil İşçiləri Həmkarlar İttifaqının rayon və şəhər komitələri tərəfindən tədbirlər keçirilib. Tədbirlərdə təhsil müəssisələrində çalışan gənc həmkarlar ittifaqı üzvləri, müəllimlər və ictimai fəallar iştirak ediblər.

Tədbir çərçivəsində gənclərin fikir və təklifləri dinlənilib, onları maraqlandıran məsələlər ətrafında səmimi müzakirələr aparılıb. Fəallığı ilə seçilən gənclər mükafatlandırılıb, onlara gələcək fəaliyyətlərində uğurlar arzulanıb.

Elm və Təhsil İşçiləri Həmkarlar İttifaqı Neftçala rayon Komitəsi “Ey hörmətli müəllim!” layihəsi çərçivəsində Neftçala Peşə məktəbində olublar.

 Elm və Təhsil İşçiləri Həmkarlar İttifaqı Neftçala rayon Komitəsi “Ey hörmətli müəllim!” layihəsi çərçivəsində Neftçala Peşə məktəbinin ittifaq üzvləri ilə görüş keçirib. Komitənin sədri Könül Məmmədova Peşə məktəbində çalışan müəllimlərlə səmimi söhbətlər aparıb, iş şəraiti ilə yaxından tanış olaraq onların sosial və psixoloji təhlükəsizlik vəziyyətini öyrənib. Daha sonra kollektivin səs çoxluğu ilə Zakir Əliyev ilk Həmkarlar İttifaqı Təşkilatının sədri seçilib.

Məktəbdə sağlam, hörmətə əsaslanan, bir-birinə dayaq olan kollektiv mühitinin formalaşmasında gördüyünüz işlərdə sizə uğurlar arzulayırıq.

ETİHİ Neftçala RK-nin təşəbbüsü ilə müəllimlər üçün yubiley tədbiri keçirilib

“Həmkara dəyər” lahiyəsi çərçivəsində ETİHİ Neftçala RK-nin təşəbbüsü ilə  Sakit Kərimov adına Qədimkənd kənd tam orta məktəbin uzun illər pedaqoji fəaliyyət göstərmiş üç əməkdaşının yubiley tədbiri keçirilib. 

Tədbirdə məktəbin əməkdar biologiya müəllimi Raziyyə Kərimova, ibtidai sinif müəllimi Çiçək Eybullayeva və laborant Gülbahar Məmədovanın yubileyləri ilə əlaqədar onlara fəxri fərman, gül dəstəsi və mükafatlar təqdim edilib.  Görüş zamanı səbəbkarlara məktəb kollektivi tərəfindən səmimi çıxışlar səsləndirilərək xoş arzular bildirilib. 

 Müəllimlər də öz növbəsində göstərilən diqqət və qayğıya görə təşəkkürünü bildirib.

 Sonda müəllimlərin iş şəraiti ilə yaxından tanış olaraq onlarla səmimi söhbət aparılıb.

 Nəzərinizə çatdıraq ki, “Həmkara dəyər” layihəsi çərçivəsində təhsil sahəsində uzun illər çalışan əməkdaşların yubileyləri diqqətimizdə olacaqdır.

BDU-da “Güclü dövlətin təməli – Azərbaycan gəncliyi” forumu keçirilib

Gənclər və İdman Nazirliyi və Bakı Dövlət Universitetinin birgə təşkilatçılığı ilə 2 fevral – Azərbaycan Gəncləri Gününə həsr olunmuş Ümummilli Lider Heydər Əliyevin gənclər siyasəti və Prezident İlham Əliyevin gələcəyə strateji baxışı kontekstində “Güclü dövlətin təməli - Azərbaycan gəncliyi” adlı forum keçirilib.

Forumdan əvvəl gənclər və könüllü təşkilatlarının, gənclər evlərinin təcrübə və könüllülük proqramlarının sərgisinə baxış olub.

Forumun açılış mərasimində Dövlət himni səsləndirilib, torpaqlarımızın azadlığı uğrunda həlak olan şəhidlərimizin əziz xatirəsi bir dəqiqəlik sükutla yad edilib.

Forumda BDU rektoru Elçin Babayev, Gənclər və İdman naziri Fərid Qayıbov, Gənclər Fondunun icraçı direktoru vəzifəsini icra edən Yusif Vəliyev və BDU məzunları çıxış edərək ölkəmizin gənclər siyasətinin uğurlarından danışıb, gənclərin təhsil, idman və ictimai fəaliyyət sahələrindəki rolunu vurğulayıblar.

Tədbir çərçivəsində “İlin gənc alimi” müsabiqəsinin nəticələri elan olunub, fəal tələbələrə təşəkkürnamələr təqdim edilib, Azərbaycan Gəncləri Günü münasibətilə bədii kompozisiya nümayiş olunub və “Dövlətçilik, təhsil və elm: Azərbaycan gəncliyinin strateji missiyası” mövzusunda panel müzakirə keçirilib.

ETİHİ-nin sədr müavini Mirzə Cəfərzadə Həmkarlar İttifaqı Komitəsinın fəaliyyətində aktiv olan tələbələrin mükafatlandırılmasında iştirak edib.