Xəbərlər

ETİHİ üzvləri Müəllimlərin XXII Yay İdman Oyunlarını 6 medalla başa vurublar

Bolqarıstanın Albena şəhərində keçirilən Müəllimlərin XXII Yay İdman Oyunlarına yekun vurulub.

Təhsil üzrə Avropa Həmkarlar İttifaqı Komitəsinin (ETUCE) üzv təşkilatlarının nümayəndələrinin iştirak etdiyi beynəlxalq yarışlarda Azərbaycan Həmkarlar İttifaqları Konfederasiyasının (AHİK) üzv təşkilatı Elm və Təhsil İşçiləri Həmkarlar İttifaqının (ETİHİ) təmsilçiləri uğurlu nəticələr əldə ediblər.

ETİHİ təmsilçiləri yarışları 4 birincilik və 2 üçüncülük olmaqla, ümumilikdə 6 mükafatla başa vurublar.

Mini-futbol üzrə komandamız final görüşündə Polşa təmsilçisini 5:4 hesabla məğlub edərək turnirin qalibi olub.

Stolüstü tennis üzrə komanda yarışlarında qadınlardan ibarət komandamız 1-ci, kişilərdən ibarət komandamız isə 3-cü yeri tutub.

Qadınlar arasında stolüstü tennis üzrə fərdi yarışda Nizami rayonu 13 nömrəli İxtisaslaşdırılmış Olimpiya Ehtiyatları Uşaq-Gənclər İdman Məktəbinin məşqçi-müəllimi Rüfət Əliyeva 1-ci, Xətai rayonu 56 saylı tam orta məktəbin müəllimi Xəyalə Qiyasova isə 3-cü yeri tutub. Şahmat üzrə fərdi yarışda isə Şəmkir rayonu Kimya və Biologiya Təmayüllü Liseyinin müəllimi Bünyad Əsgərov 1-ci yerə layiq görülüb.

Sonda qaliblər Bolqarıstan Müəllimlər Birliyinin prezidenti Yanka Takeva, Bolqarıstan Müstəqil Həmkarlar İttifaqları Konfederasiyasının vitse-prezidenti Todor Kapitanov, Bolqarıstan İşçilərinin İdman və Sağlamlıq Federasiyasının prezidenti, Balkan İşçi İdmanı Assosiasiyasının vitse-prezidenti Desislava Yagodin və Varna şəhərinin meri Blagomir Kotsev tərəfindən kubok və medallarla təltif olunublar.

Beynəlxalq yarış təhsil işçiləri arasında sağlam həyat tərzinin təşviqində, eləcə də həmkarlar ittifaqı üzvləri arasında dostluq və əməkdaşlıq əlaqələrinin inkişafında mühüm rol oynayır.

Qeyd edək ki, 2004-cü ildən etibarən keçirilən bu yarışlarda Ümummilli Lider Heydər Əliyevin anadan olmasının ildönümünə həsr olunmuş respublika idman yarışlarında yüksək nəticələr göstərərək seçilmiş ittifaq üzvləri iştirak edirlər.

ETİHİ üzvləri Müəllimlərin XXII Yay İdman Oyunlarında uğurla çıxış edirlər

Bolqarıstanın Albena şəhərində Təhsil üzrə Avropa Həmkarlar İttifaqı Komitəsinin (ETUCE) üzv təşkilatlarının nümayəndələrinin iştirakı ilə Müəllimlərin XXII Yay İdman Oyunları keçirilir.

Azərbaycan Həmkarlar İttifaqları Konfederasiyasının üzv təşkilatı Elm və Təhsil İşçiləri Həmkarlar İttifaqının (ETİHİ) üzvləri də bu beynəlxalq yarışlarda iştirak edirlər.

Azərbaycan təmsilçiləri mini-futbol, stolüstü tennis, basketbol, çimərlik voleybolu və şahmat olmaqla 5 idman növündə mübarizə aparırlar.

Avqustun 27-28-də keçirilən yarışlarda ittifaq üzvlərimiz bir sıra uğurlu nəticələr əldə ediblər.

Mini-futbol üzrə komandamız qrup mərhələsini 6 xalla başa vuraraq yarımfinala yüksəlib. Yarımfinalda Bolqarıstanın “Vraça” komandasını 3:1 hesabı ilə məğlub edən təmsilçilərimiz finala vəsiqə qazanıblar.

Stolüstü tennis üzrə qadın və kişi komandalarımız da qrup mərhələsində keçirdikləri bütün qarşılaşmalarda qələbə qazanıblar. Qadınlardan ibarət komandamız 6 xalla, kişilərdən ibarət komandamız isə 8 xalla qrup mərhələsini lider kimi başa vuraraq final mərhələsinə yüksəliblər.

Şahmat üzrə fərdi yarışlarda Şəmkir rayon Kimya-biologiya təmayüllü liseyin müəllimi Bünyad Əsgərov I yeri tutub. O, həlledici qarşılaşmada Polşanın “ZNP” komandasının təmsilçisinə qalib gələrək yarışın qalibi olub.

Qeyd edək ki, Müəllimlərin Yay İdman Oyunları 2004-cü ildən etibarən ənənəvi olaraq hər il Bolqarıstanda keçirilir. Oyunlarda Ümummilli Lider Heydər Əliyevin anadan olmasının ildönümlərinə həsr edilən ölkədaxili idman yarışlarında yüksək nəticələr göstərərək münsiflər heyəti tərəfindən seçilən ittifaq üzvlərimiz iştirak edirlər.

Yarışlar avqustun 30-dək davam edəcək.

Neftçalada qəbul imtahanlarında yüksək nəticə göstərən şagirdlərlə görüş keçirilib

Təhsil həyatında böyük uğur qazanan, qəbul imtahanlarında 600-dan yüksək bal toplayaraq yüksək nəticə göstərən şagirdlərlə görüş keçirilib.

Görüşdə yüksək nəticə göstərən şagirdlərlə yanaşı, onların müəllimləri və valideynləri də iştirak ediblər. Səmimi və xoş ab-havada keçən görüşdə şagirdlərin qazandıqları uğurlar, imtahan prosesində qarşılaşdıqları çətinliklər, məqsədlərinə çatmaq üçün göstərdikləri əzm və zəhmət barədə maraqlı söhbətlər aparılıb.

Çıxış edən qonaqlar -YAP Neftçala rayon təşkilatının sədri Ülvi Fərzəliyev, “Gündoğar” qəzetinin baş redaktoru Bədirə Niftəliyeva, Şirvan-Salyan Regional Mədəniyyət İdarəsinin Neftçala rayon üzrə nümayəndəsi Gülər Mirzəyeva, məktəb direktorları, müəllimlər və valideynlər şagirdləri qazandıqları yüksək nəticə münasibətilə təbrik edib, onlara gələcək təhsil həyatlarında uğurlar arzulayıblar. Bildirilib ki, bu nailiyyət yalnız şagirdlərin deyil, eyni zamanda onların müəllimlərinin və valideynlərinin birgə əməyinin nəticəsidir.

Görüş iştirakçıları tərəfindən şagirdlərin yüksək nəticələri xüsusi qeyd olunaraq onların əzmkarlığı və məsuliyyətli yanaşması təqdir edilib.

Sonda yüksək nəticə göstərən şagirdlərə təşəkkürnamələr və xatirə hədiyyələri təqdim olunub. Görüş xoş söhbətlər və səmimi ünsiyyət şəraitində çay süfrəsi ətrafında davam edib.

Neftçala 1 saylı Körpələr evi uşaq bağçasında "Əlvida, bağça" adlı tədbir keçirilib

Neftçala şəhər 1 saylı Körpələr Evi–Uşaq Bağçasında balacaların bağça həyatına vida, məktəb həyatına isə ilk addım münasibətilə “Əlvida, bağça!” adlı möhtəşəm tədbir keçirilib.

İllərdir bağçada qazandıqları bilik və bacarıqlarla artıq məktəbə qədəm qoymağa hazırlaşan balacalar öz çıxışları, şeirləri, mahnıları və rəqsləri ilə tədbirə xüsusi rəng qatıblar.

Bağça illəri uşaqlığın ən gözəl xatirələrindən biridir. Bu gün balacalar üçün yeni bir yolun başlanğıcıdır — məktəb həyatı, yeni dostlar, yeni biliklər və böyük arzular!

Əziz balacalar, məktəb yolunuz açıq, uğurlarınız bol olsun! Hər zaman sağlam, xoşbəxt və işıqlı gələcəyə doğru addımlayın!

Netfçalada 80 yaşlı müəllimin yubiley tədbiri keçirilib

“Könüllü qonaq” bu dəfə uzun illər təhsil sahəsində şərəfli fəaliyyət göstərmiş təqaüddə olan müəllim Əkbərov Səfalı Abdulrəhim oğlunun qonağı olub.

“Könüllü qonaq” layihəsi çərçivəsində bu dəfə ömrünün 80-ci ilini qarşılayan, Neftçala şəhər 1 və 4 nömrəli tam orta ümumtəhsil məktəblərinin rus dili müəllimi olmuş Əkbərov Səfalı Abdulrəhim oğlunun yubiley tədbirində iştirak etdik.

Səfalı müəllimin 80 illik yubileyi münasibətilə təşkil olunan görüş doğma və səmimi ab-havası ilə yadda qalıb. Tədbirdə onun yetirmələri – keçmiş şagirdləri, uzun illər çiyin-çiyinə çalışdığı müəllim həmkarları, ailə üzvləri və yaxınları iştirak edərək yubilyara xoş arzularını çatdırıblar. Görüş boyu Səfalı müəllimin həyat və pedaqoji fəaliyyətinə dair maraqlı xatirələr səsləndirilib, keçmiş günlər yad edilib, onun insan və müəllim kimi formalaşdırdığı dəyərlərdən söz açılıb.

Tədbirdə çıxış edən ETİHİ Neftçala Rayon Komitəsinin sədri Könül Məmmədova Səfalı müəllimi 80 illik yubileyi münasibətilə ürəkdən təbrik edərək ona möhkəm cansağlığı, uzun ömür və doğmalarının əhatəsində xoş günlər arzulayıb. Qeyd edilib ki, müəllim ömrünün ən böyük qazancı yetişdirdiyi şagirdlər, qazandığı hörmət və illər keçsə də unudulmayan xoş xatirələrdir.

Daha sonra Səfalı müəllimə fəxri fərman və xatirə hədiyyəsi, həyat yoldaşı Səadət müəllimə isə gül dəstələri təqdim olunub.

Səmimi söhbətlər, xoş xatirələr, gülüş və duyğulu anlarla müşayiət olunan görüş hər kəs üçün əziz və yaddaqalan olub. Bir zamanlar onun sinfində əyləşən şagirdlərin bu gün müəllimlərinin 80 illik yubileyində onunla bağlı xatirələrini bölüşməsi isə tədbirin ən kövrək və qürurverici məqamlarından biri olub.

Əziz Səfalı müəllim, Sizi bir daha yubileyiniz münasibətilə təbrik edir, sağlam, firavan və mənalı ömür arzulayırıq. Qoy bundan sonrakı illəriniz də doğmalarınızın sevgisi, keçmiş şagirdlərinizin hörməti və gözəl xatirələrin işığında keçsin!

Neftçalada 50 il bağça müdiri işləmiş təqaüdçü müəllimə baş çəkilib

“Könüllü qonaq” 50 ilə yaxın bağça müdiri işləmiş, “Tərəqqi” medallı təhsil işçisini ziyarət edib.

“Könüllü qonaq” layihəsi çərçivəsində uzun illər təhsil sahəsində fədakarlıqla çalışan, ömrünün böyük bir hissəsini məktəbəqədər təhsilin inkişafına həsr edən, “Tərəqqi” medallı təhsil işçisi Novruzova Zöhrə Ağagül qızı ziyarət olunub.

Görüş zamanı bu xoş sürpriz müəllimə böyük sevinc və kövrək duyğular yaşadıb. Səmimi söhbət ətrafında onun uzun illik əmək fəaliyyəti, bağça rəhbəri kimi keçdiyi şərəfli yol və yadda qalan xatirələri bir daha yada salınıb.

Görüşdə Zöhrə müəllimin keçmiş həmkarlarının da iştirakı görüşə xüsusi rəng qatıb. İllərin həmkarları arasında səmimi söhbətlər aparılıb, maraqlı xatirələr bölüşülüb, keçmişin unudulmaz anları xoş təbəssümlərlə xatırlanıb.

Zöhrə müəllimə Komitə sədri Könül Məmmədova tərəfindən əməyinə verilən dəyərin və göstərdiyi xidmətlərə olan ehtiramın ifadəsi olaraq Fəxri Fərman, gül dəstəsi və xatirə hədiyyəsi təqdim olunub.

Tədbirin sonunda Zöhrə müəllim göstərilən yüksək diqqət və ehtirama görə dərin minnətdarlığını ifadə edərək, ETİHİ ailəsinə təşəkkürünü bildirib.

“Könüllü qonaq” layihəsi cəmiyyətə örnək olmuş müəllimlərin zəngin həyat və fəaliyyət yolunu gənc nəslə tanıtmaq, onlara göstərilən ehtiramı ifadə etmək və müəllim əməyinə verilən dəyəri yaşatmaq məqsədi daşıyır.

Neftçalada 91 yaşlı müəllim ziyarət olunub

“Könüllü qonaq” 91 yaşlı müəllimə baş çəkdi

“Könüllü qonaq” layihəsi çərçivəsində uzun illər təhsil sahəsində səmərəli fəaliyyət göstərmiş, yüzlərlə şagirdin elmə, biliyə və həyata hazırlanmasında əvəzsiz xidmətləri olan Neftçala rayonu Həsənabad qəsəbəsi Şəmsəddin Orucov adına 1 nömrəli tam orta məktəbin rus dili müəllimi Məmmədova Elvira Mehdi qızının ailəsi ziyarət olunub.

Səmimi və duyğulu ab-havada keçən görüşdə müəllimin müxtəlif illərdə dərs dediyi şagirdlər, uzun illər çiyin-çiyinə çalışdığı həmkarları və yaxınları iştirak ediblər. Çıxış edənlər Elvira müəllimin yüksək peşəkarlığından, zəngin pedaqoji təcrübəsindən, nəcib insani keyfiyyətlərindən, şagirdlərinə göstərdiyi qayğı və diqqətdən bəhs ediblər.

Elvira müəllim də həyat yolundan söhbət açaraq ailəsinin Almaniyadan deportasiya edilərək Azərbaycana köçürülməsindən, eləcə də 31 Mart Soyqırımı dövründə ailəsinin üzləşdiyi ağır faciələrdən danışıb. Onun xatirələri iştirakçılar tərəfindən böyük maraq və duyğusallıqla dinlənilib.

Görüş zamanı Elvira müəllimə uzunillik, nümunəvi pedaqoji fəaliyyətinə, təhsilin inkişafına verdiyi dəyərli töhfələrə görə fəxri fərman, gül dəstəsi və xatirə hədiyyəsi təqdim olunub.

Tədbirin sonunda müəllimin ailəsi göstərilən yüksək diqqət və ehtirama görə dərin minnətdarlıqlarını ifadə edərək, ETİHİ ailəsinə təşəkkürlərini bildiriblər.

“Könüllü qonaq” layihəsi cəmiyyətə örnək olmuş müəllimlərin zəngin həyat və fəaliyyət yolunu gənc nəslə tanıtmaq, onlara göstərilən ehtiramı ifadə etmək və müəllim əməyinə verilən dəyəri yaşatmaq məqsədi daşıyır.

Neftçalada ittifaq üzvünün 65 yaşı qeyd olunub

“Həmkara dəyər” layihəsi çərçivəsində Neftçala rayon Təhsil Sektorunun Mərkəzləşdirilmiş Mühasibatlığının mühasibi Talıbova Niyar İnqilab qızının 65 illik yubileyi keçirilib.

Səmimi və duyğulu ab-havada keçən görüşdə Niyar xanımla uzun illər birlikdə çalışdığı həmkarları iştirak ediblər. Çıxış edənlər ittifaq üzvümüzün peşəkarlığından, yüksək insani keyfiyyətlərindən söz açıblar.

Görüş zamanı yubilyara uzunmüddətli, nümunəvi fəaliyyətinə görə fəxri fərman, gül dəstəsi və mükafat təqdim olunub.

Neftçalada Respublika Fənn Müsabiqəsinin qalibi mükafatlandırılıb

Neftçala şəhər Samid İmanov adına 1 nömrəli tam orta ümumtəhsil məktəbinin VI sinif şagirdi İbrahimli Zəhra Cavid qızı Respublika Fənn Müsabiqəsində təbiət fənni üzrə yüksək nəticə göstərərək gümüş medala layiq görülmüşdür.

Bu uğur münasibətilə məktəbin direktoru Ülviyyə Abdullayeva, Zəhranın müəllimi Nahidə Zeynalova və valideyni iştirak etmiş, onun qazandığı nailiyyət yüksək qiymətləndirilərək şagirdin əldə etdiyi uğurun məktəbin və rayonun təhsil sahəsində qazandığı mühüm nailiyyətlərdən biri olduğu qeyd edilib.

Sonda Zəhra İbrahimliyə ETİHİ Neftçala rayon Komitəsi adından təşəkkürnamə və hədiyyə təqdim edilib, gələcək müsabiqə və olimpiadalarda yeni-yeni uğurlar arzulanıb.

Neftçala Peşə Məktəbinin kollektivi üçün Qəbələ rayonuna ekskursiya təşkil olunub

“Həmkarla gəzək” layihəsi çərçivəsində bu dəfə Neftçala Peşə məktəbinin pedaqoji kollektivi üçün Qəbələ rayonuna ekskursiya təşkil olunub.

Səfərin əsas məqsədi həmkarların asudə vaxtının səmərəli təşkili, kollektiv arasında dostluq və həmrəylik münasibətlərinin daha da möhkəmləndirilməsi, eyni zamanda ölkəmizin zəngin tarixi və mədəni irsi ilə yaxından tanış olmaq olub.

Ekskursiya zamanı iştirakçılar Qəbələnin görməli məkanlarını ziyarət ediblər. Onlar bölgələrin qədim tarixi, mədəniyyəti və turizm potensialı haqqında ətraflı məlumat əldə edib, əsrarəngiz təbiət mənzərələri fonunda xoş və yaddaqalan anlar yaşayıblar.

“Həmkarla gəzək” layihəsi çərçivəsində təşkil olunan bu cür səfərlər həmkarlar arasında ünsiyyəti möhkəmləndirməklə yanaşı, onların mənəvi istirahətinə və ölkəmizin müxtəlif guşələrinin daha yaxından tanınmasına da xidmət edir.

Netfçalada mətbuat günü qeyd olunub

Neftçalada Milli mətbuatın yaranmasının 151-ci ildönümünə həsr olunmuş tədbir keçirilib.

Görüşdə icra nümayəndələri, ziyalılar, veteran mətbuat və mədəniyyət işçiləri, ictimaiyyət nümayəndələri iştirak edirdi. Milli mətbuatımızın keçdiyi inkişaf yolu, söz azadlığının əhəmiyyəti, jurnalistikanın cəmiyyətin formalaşmasındakı rolu ətrafında maraqlı fikir mübadiləsi aparıldı. Tədbir zəngin xatirələr, səmimi söhbətlər və xoş təəssüratlarla yadda qaldı.

ETİHİ Neftçala raton Komitəsinin sədri Könül Məmmədova 10 ildən çox təhsil sahəsində xidmət etmiş, Milli mətbuatımızın inkişafına töhfə verən “Gündoğar” qəzetinin baş redaktoru Bədirə xanım Niftəliyevanı təbrik edərək ona gül dəstələri, fəxri fərman və xatirə hədiyyəsi təqdim edib.

Vətən və dövlətçilik naminə çalışan bütün media nümayəndələrini peşə bayramları münasibətilə təbrik edir, fəaliyyətlərində yeni uğurlar arzulayırıq!

Neftçalanın ucqar kəndində yaşayan təqaüdçü müəllimə baş çəkildi

ETİHİ Neftçala Rayon Komitəsinin həyata keçirdiyi “Könüllü qonaq” layihəsi çərçivəsində növbəti görüş Neftçala rayonu Aşağı Surra kənd ümumi orta ümumtəhsil məktəbinin riyaziyyat müəllimi olmuş Dadaşov Rahil Ağkərim oğlu ilə keçirilib.

Layihə çərçivəsində müəllimlərin keçmiş həmkarlarının da görüşə qoşulması bu səmimi məclisə xüsusi rəng qatıb. Uzun illərin zəhmətini, xatirələrini və dostluq bağlarını özündə birləşdirən bu görüş duyğulu anlarla yadda qalıb.

Görüş zamanı Rahil müəllimə uzunmüddətli pedaqoji fəaliyyətinə və təhsilin inkişafına verdiyi dəyərli töhfələrə görə fəxri fərman təqdim olunub.

Sonda göstərilən diqqət və qayğıya görə təşkilatçılara və qonaqlara dərin minnətdarlıq bildirilib.